नगाउँमा सम्पदा क्षेत्र सरसफाई कार्यक्रम तथा फोटो प्रदर्शनी

नगाउँमा सम्पदा क्षेत्र सरसफाई कार्यक्रम तथा फोटो प्रदर्शनी

लायन्स क्लब अफ काठमाडौ कीर्तिपुर र लियो क्लब अफ काठमाडौं कीर्तिपुरको संयुक्त संयोजकत्वमा, कीर्तिपुर नगरपालिका र विभिन्न संघ संस्थाहरु तथा स्थानिय जनताहरुको सहयोगमा  मिति २०६९ श्रावण महिना देखि हरेक महिना की.न.पा. र मच्छेगाउँमा गरि जम्मा १२ वटा सम्पदा क्षेत्रमा “सम्पदा क्षेत्र सरसफाई अभियान” संचालन भै रहेको छ । सम्पदा क्षेत्र सरसफाई कार्यक्रममा सम्पदा क्षेत्र तथा सम्पदा मार्गको सरसफाई र सम्पदा संरक्षणको लागि जनचेतनामूलक कार्यक्रमहरु संचालन गरिदैं आएको छ ।

“सम्पदा क्षेत्र सरसफाई अभियान” अन्तर्गत बाघभैरव स्थान, मच्छेनारायण मन्दिर क्षेत्र, उमामहेश्वर मन्दिर क्षेत्र, इन्द्रायणी क्षेत्र (पिगं), आदिनाथ मन्दिर क्षेत्रमा सरसफाई कार्यक्रम सम्पन्न भै सकेको छ । न्हय् गां जात्रा ( सात गाउँको जात्राको उपलक्ष्यमा यहि २०६९ मंसिर ३० गते विहान ७:३० बजे देखि विहान ९ बजे सम्म नगाउँको बालकुमारी मन्दिर क्षेत्र, पिगं लगायत नगाउँव्यापी सरसफाई कार्यक्रम संचालन भएको छ । सरसफाईपछि नगाउँको लाछीमा विहान १० बजे देखि दिउँसो २ बजेसम्म कीर्तिपुर क्षेत्रको धार्मिक, सांस्कृतिक तथा पर्यटन महत्वका क्षेत्रहरुको फोटो प्रदर्शनी पनि गरिएको थियो ।

न्हय्गाः जात्रा ( सात गाउँको जात्राको फोटो सहित) तथा गथु प्याँख सम्बन्धी फ्लेक्स फोटोहरु प्रदर्शन गरिएको थियो । साथै विहान १०:३० बजे नगाउँको “धाल्चा खाकेगु जात्रा” को भिडियो प्रदर्शन पनि गरिएको थियो । सरसफाई कार्यक्रम तथा फोटो प्रदर्शनीको लागि बाल कुमारी बचत तथा ऋण संस्थाका उपाध्यक्ष सादुराम महर्जनको संयोजकत्वमा आमा समूह तथा संघ संस्थाका प्रतिनिधिहरु समेतको ८ सदस्यीय तयारी समिति गठन गरिएको थियो ।

उक्त दिन नगाउँबासीहरूको व्यापक रुपमा सहभागीता रहेको थियो । लियो क्लब र लायन्स क्लबका पदाधिकारीहरू भ्याइ नभ्याइ खटिरहेको देखिन्थ्यो । एक हप्ता अगाडिनै नगाउँमा जात्रा आएको जस्तो देखिन्छ । यो सरसफाई अभियानलाई कमसे कम हप्ताको एकदिन मात्र स्थानियबासीले निरन्तरता दिएमा नगाउँ क्षेत्रको मुहार फेर्न सकिन्थ्यो । लायन्स क्लब अफ काठमाडौं कीर्तिपुरका अध्यक्ष रबिन्द्र बहादुर प्रधानले विभिन्न अवसरमा खिच्नु भएका फोटोहरूलाई दर्शकहरूले ध्यान दिएर हेरेर मन पराएको देखिन्छ ।