गजल सौरभ शाक्यया — २ व ३

अंक ८१ ने. सं. ११३३ सिल्लाथ्व दशमी  बुधवाः २०६९ फागुन ९ गते  बुधवार Feb 20, 2013


गजल–२ डिसेम्बर ३ २०१२

पुलांगु खँ लुमनेवं ग्यासेव जितः
घाःहिइसे च्वनेवं ग्यासेव जितः ।
तातुनाःगु पूमवनेवं तसकं म्हाइपु
ज्या यायां स्यनेवं ग्यासेव जितः ।
जमाना धेबाया जुयावन स्व स्वथाय्
पलाःतयाथाय् द्वनेवं ग्यासेव जितः ।
वनाच्वना आज्जुलिना थ्यंकेमा अन
वं वं बे–लँय् थ्यनेवं ग्यासेव जितः ।

गजल– ३ डिसेम्बर ५, २०१२

मिखाय् खंगु लुइस, लसय् च्वयाच्वनी गजल
मतिनाया यःत्यःस फसय् थ्वयाच्वनी गजल ।
चकमक क्यबय्, नस्वाः स्वां स्वां हःपतिकं
निभाःया जलं तिकि तिकि ज्वयाच्वनी गजल ।
जः व ख्यूँया सुलाकासाः म्हिताच्वन लकसय्
इमि दथूलँ मात्याः यायेत स्वयाच्वनी गजल ।
ज्यामीया म्होसलय् दासिवःगु जल्ल मोती
हि चःतिया कमाई खः ब्वयाच्वनी गजल ।
अव्यवस्था, बेकारी, थिकेलं देश बेहाल जुयाच्वन
जनताया नुगः जायेक बिद्रोह ग्वयाच्वनी गजल ।