बुंगद्यः व किपूया स्वापू किपूमितय् ‘जिलाजं’ बुंगद्यः

अंक ९४ ने. सं. ११३३ बछलाथ्व द्वादशी बुधवाः २०७० जेठ ८ गते बुधवार May 22, 2013

नेपालभाषा

बुंगद्यः  व किपूया स्वापू  किपूमितय् ‘जिलाजं’ बुंगद्यः

श्रीकृष्ण महर्जन

थौंकन्हय् बुंगद्यःया जात्रा यलय् जुयाच्वंगु दु । बुंगद्यःया जात्राया झ्वलय् किपूमितय्गु नं तःधंगु सहभागीता खने  दु ।

बुंगद्यःया रथ यलया इति त्वालंनिसें सालाः हयेगु ज्या किपूमितय्सं यायेमाःगु चलन दु । अले किपूया बाजा नापं किपूया पूजा मवंतले अन रथ जात्रा तकं न्ह्याइमखु । उलि जक मखु अथे इति त्वालं जाउलाख्यलय् तक सालाः हयेगु साइतसिबें प्यन्हु न्ह्यः हे किपूया क्वाच्वं क्वय् च्वंगु प्यंगः थां धाइगु थासय् बुंगद्यःया पाञ्जुत वया पूजा प्रसाद बिइमाःगु चलन दु । 

अले प्रसाद काइम्ह मनू धइगु उगु लागाया इहिपाः मजूनिम्ह मिसा खः । सुथंनिसें नीची याना च्वंम्ह मिसां हे उगु पूजा कायेमाःगु चलन दु । अथे पूजा काइगु चलनया मूल कारण धइगु बुंगद्यःया न्हापा ल्यासे किपूया प्यंगः थामय् दुगु अले बुंगःदेवं बचं बिउगु कथं द“य् छकः प्रसाद अर्थात स्वां बिउ वयेमाःगु चलन खः । 

उकिं गुलिं गुलिं ज्याथःपिन्सं बुंगद्यःयात किपूमितय् जिलाजं धकाः तकं आः तक नं धायेगु याना वयाच्वंगु दु । ज्याउलाख्यःया नितिं बुंगद्यःया रथ सालेगु नितिं किपूया पूजा वयेमाः धाःगु हे किपुलिइ च्वंम्ह प्यंगः थांया बुंगद्यःया ल्यासेपाखें पूजा वयेमाः धाःगु खः धकाः स्वयं पाञ्जुतय्सं स्वीकार यानादीगु दु । उलि जक मखु किपूया प्यंगः थामय् न्ह्याबलें नं इहिपाः मजूनिम्ह मिसा छम्ह दयाच्वंगु दु अले दया च्वनी धइगु जन धारणा दु । 

अथे हे बुंगद्यःया रथ जात्राया झ्वलय् यलया इति लागांनिसें सालाः ज्याउला ख्यलय् तक हयेगु भाला किपूमितय्गु हे खः धाइ । उलि जक मखु अन किपुलिइ बुंगद्यःया रथ सालाः यंकी धकाः हे यलय्च्वंपिन्सं ज्याउला ख्यलय् गाः म्हुयातःगु अले व हे गालय् कुतुं वना किपुलिइ हये मखंगु खः धकाः आः तक नं ज्याथःपिन्सं धयाच्वंगु दु । ज्याउला ख्यलय् बुंगद्यःया रथ किपूपाखे अर्थात पश्चिमपाखे स्वका तयेमाःगु चलन आः तक नं दु । 

अले ज्याउला ख्यलय् बुंगद्यःया रथ थ्यनीगुयात हे किपूमितय्सं नापं यलया पश्चिम अले ये“या दक्षिण पश्चिमपाखे च्वंगु नगां, पांगा, थक्वाः, मच्छेगां, सतुंगः नापं थीथी लागाया नेवाःतय्सं नखः हना वयाच्वंगु दु । अथे हे बुगंद्यःया झिंनिद“य् छकः बुंगंनिसें यलय् तक रथ साला हयेगु झ्वलय् धोविघाट लागाय् नं छगः थां तयातःगु दु । किपुलिइपाखे रथ सालाः यंकी धकाः अथे थां धंकातःगु धाइ धकाः बुंगद्यःया पाञ्जु कमलराज गुरुजुं धयादीगु दु ।

उकिं किपूमित नाप बुंगद्यःया जात्रा नापं बुंगद्यः तसकं स्वापू दयाच्वंगु दु । अले किपूमितय्सं नं बुंगद्यःयात थःपिनि जिलाजं कथं नाला वयाच्वंगु दु ।