महाभारतया भीमसेन व नेवाःतय्गु भिन्द्यः छम्ह हे मखु

अंक १०९ ने. सं. ११३३ गुंलागा चतुर्दर्शी बुधवाः २०७० भाद्र १९ गते बुधवार Sep -4 2013
 
महाभारतया भीमसेन व नेवाःतय्गु भिन्द्यः छम्ह हे मखु

राज श्रेष्ठ, किपू

महाभारतया भीमसेन व नेवाःतय्गु भिन्द्यः छम्ह हे मखु । भारतवर्षय गनं नं महाभारतया भीमसेनयात अलग्ग हे कथं पुजा यायेगु वा महत्व बियातःगु मदु । भीमसेनया अस्तित्व धैगु हे पंचपाण्डवया जेठाम्ह युधिस्थिरया न्ह्योने ल्यूने जक दं वइ । थःगु ताकत क्यनेगु बाहेक भीमसेनया राजनीतिक व आर्थिक छुं हे कथं मेगु पक्षय् सक्रियता मदु । थ्व झीसं महाभारत ब्वना स्वल धाःसा बांलाक्क हे ध्वाथुइके फइ । भारतवर्षय् तक्क नं भीमसेनया अलग्ग हे मूर्ति वा मन्दिर दयेका पुजा याना वयाच्वंगु इतिहासय् मदु ।

अथेजुसां नेपालय् जक भीमसेनयात नेवाःतय्सं बनेज्या सुथां लाकिम्ह भिन्द्यः कथं कायेमाःगु छुं आवश्यकता खने मदु । महाभारतया भीमसेन नेपाः गालय् वया थन छुं कथंया ज्याः याना वन धैगु खँ महाभारतया गन नं उल्लेख यानातःगु खने मदु । खः महाभारत युद्ध लिपा छुं दँ हस्तिनापुरय् राज्ययाना युधिस्थिर थः किजापिं व द्रौपदी नापं हिमालय पर्वत प्रस्थान यात धकाः उल्लेख दुसां अन नेपाःगालय् थ्यंका थनया धर्म संस्कृति, जनजीवनयात हे प्रभाव लाई कथं छुं ज्यायात धैगु उल्लेख खने मदु । उपिं राजनीतिं सन्यास कया म्वाम्वाकं स्वर्ग प्रस्थानया निंतिं हिमालय यात्राय जक वःगु खने दु । उपिं महाभारत ग्रन्थय् उल्लेख याना तःगु कथं धायेगु खःसा जूम्हिता बुइधुंकालि बनबास लिपा चिहाकःगु गुप्तबासया निंति नेपाः गालय् वल धकाः नं उल्लेख मदु । यदि पंचपाण्डबत व कौरवया गुप्तचरत नेपाः गालय् थ्यंक वःगु खःसा उकिया छुं छुं दसु थन दये हे माःगु खः । अझ भिमसेनया भूमिका धैगु उगु हिमालय महाप्रस्थान यात्राय् युधिस्थिर नाप न्हापालाक्क द्रौपदी लँय् क्वदबलय् द्रौपदीया छु द्वंविद्वं दु ? नहकुल व सहदेवपिं छाय् झीपिं नाप वये मफुत ? अर्जुनया दोष छु खः ? अलय् लिपालाक्क थः नं क्वदसेंलिं जिगु छु गल्ती जुल छाय् जि म्वाम्वाकं स्वर्गय् वये मखन ? धकाः न्यनेगु बाहेक मेगु छुं मदु । महाभारतया भीमसेनं थःगु दे हस्तिनापुरय् हे अनया जनताया आर्थिक अवस्था बांलाकेत व्यापार, व्यवसाय यायेमा धकाः स्यनावंगु मदुसा व नेपाः गालय् वया नेवाः बन्जातय्त ल्हासाय् बनेज्या याना थःगु देया दुगक्वेँ बल्लाकि धकाः स्यना थकुगुलिं वयात नेवाःतय्सं थःगु आजुद्यः भाःपिया थःगु छेँ छेँ, पसः पसःलय् देगः देगलय् वयागु भव्य मूर्ति दयेका तसकं भव्य कथं तान्त्रिक विधि कथं जात्रा न्यायेकल धायेगु छगू कोराकल्पन सिबय् मेगु मखु धासाः पायछि मजू धकाः कुंखिने फइमखु । भीमसेन थःगु जीवनया अन्तिम क्षणय् हिमालय पर्वत प्रस्थानया निंति जक वःम्ह जूगु, गुकि महाभारत ग्रन्थय् उल्लेखित दु, वं नेवाःतय्त तिब्बतनाप व्यापार या धकाः गुकथं धाल जुइ, मखुला थ्व अजूचाइपूगु खँ । महाभारत युद्ध त्याकेधुंका लिपा नं नेपाःनाप हस्तिनापुरया छुं हे सम्बन्धया उल्लेख मदु गुकि छगू अजूचाइपुगु खँ खः । नेवाःतय्त उलिमछि गुणगान वम्हेस्यां छु नेपाःयात चटक्क हे ल्वमंका छ्वल ला ?

महाभारतय् उल्लेख जुयाच्वंगु विराटपर्वय पाण्डवत गुप्तवासया सिलसिलाय् जुजु विराटया राजदरवारय् गुप्त भेष कया सुलाच्वंगु उल्लेख दु । जुजु विराटया राज्य आःयागु नेपाःया विराटनगर खः धकाः धयातःगु न दु । विराट जुजुया राजदरवारय् भीमसेन व पंचपाण्डवपिं च्वनाच्वंगु व अन द्रौपदीयात सासना बियाच्वंम्ह किचकयात भीमसेनं वधयात धकाः धयातःगु नं दु । यदि थ्व खँ सत्य खःसा झीसं मेगु खँ, गुकिं छु धाइधाःसा दोलखाया नेवाःभाय्यात पंचपाण्डव अन गुप्तवास च्वंबलय् थःपिं दथुइ खँल्हाबल्हा यायेत दयेका थकुगु गुप्तभाषा खः धकाः धाइ, थ्व धापु गलत खः धकाः धायेमाः । यदि अथे खःसा पंचपाण्डवत गुप्तवास च्वनावंगु थासय् व भाय् नं अनयापिं मनूतय्त स्यनावंगु नं जुयाच्वन । दोलखाया भिन्द्यः जगप्रसिद्धम्ह, दोलखाया नेवाः भाय् यदि भीमसेनया गुप्त भाषा खःसा छाय् व विराटनगरय् प्रचलित मजुल वा छाय् व भाय् हस्तिनापुर लिहांवने धुंकाः भारतवर्षय मेगु राष्टिूय भाषा कथं पिमब्वल ? भारतवर्षया इतिहास दुने व भाय् गन वन ? छु दोलखाया नेवाःतय्त जक व भाय् सुटुक्क स्यना थकुगु खः ला ? थुलि थाकुक दयेका थकूगु भाय् म्वाम्वाकं पाण्डवतय्सं परित्याग यातला ? थःम्हेस्या दयेका थकुगु भाय् छु जुल धकाः हानं छकः स्वःवये म्वाःला ?

छाय् थथे मजुल ? छाय्कि थ्व दोलखाया भिन्द्यःयात महाभारतया भीमसेन प्रमाणित यायेगु नितिं दोलखाया नेवाःभाय्, गुगु भाय् येँ यल ख्वप सिबें पाः, व भाय्यात गुप्तवासकालीन पचपाण्डवतय्गु गुप्त भाषा कथं हिलेगु छगू तःधंगु द्वं खः । वास्तवय् दोलखाया नेवाःभाय् नेपालभाषाया छगू पुलांगु प्राचीन स्वरुप ज्वना थौं तक्क न म्वानाच्वंगु भाय् खः । व भाय्लय छाय् संस्कृतया प्रभाव खने मदु गुकि भीमसेनया भाय् खःसा अवश्य न खने दयेमाःगु खः । दोलखाया नेवाःतय्सं ल्हाये सःगु व भाय् हस्तिनापुरया जनतातय्सं न ल्हाये सये फयेमा धकाः पंचपाण्डवतय्सं विचाः मयाः जुइला ?

अझ मेगु द्वं धैगु ला भीमसेनया काय घटोटकचया काय धकाः यलम्बरयात धायेगु खः । (भाजु विजय शर्मा राजोपाध्यायया च्वसु भिन्द्यः वा भीमसेनलाई नेवारहरू आफ्ना पुर्खा देवता मान्दछन फेसबुकय् अक्टोबर ३१, २०१२) किराती जुजु यलम्बरयात नेवाःतय्गु पुर्खा कथं नालाः कयातःगु दु । जुजु यलम्बर महाभारतकालीन जुजु खः धकाः धाइगु या । थ्व जुजु महाभारत युद्धय् ब्वति काः वंबलय् कृष्णं छल याना छ्यों ध्यना स्याःगु, व हे छ्यों आकाशमार्गं वया वंघलय् आकाश भैरव कथं स्थापित जुल धयातःगु दु । यदि भीमसेनया छ्यों जुजु यलम्बर खःसा छाय् थ्व जुजुं पाण्डवया पक्षय युद्ध मल्वात ? छाय् कृष्णं वयागु छ्यों ध्यने माल ? जुजु यलम्बरयात भीमसेनया छ्यों दयेकेगु खःसा वया नां छाय महाभारत ग्रन्थय् दुमथ्यात ? उलिमछि सछि सछिम्ह कौरवतय्गु नां दुगु महाभारत ग्रन्थय् जुजु यलम्बर, पंचपाण्डवतय् छय्, नेपाःगालय् शासन यानाच्वंम्ह छम्ह शक्तिशालिम्ह जुजु, गुम्ह खनाः स्वयम् भगवान कृष्ण हे ग्यात, उम्हेस्या नां दुथ्याके म्वाःला ? अय् महाभारत च्वमि ?

किरात जुजु यलम्बरयात भीमसेनयाा छय् दयेकेगु कुतः धैगु नेवाःतय् आजुबराजु महाभारतया भीमसेन खः धैगु पुष्टिया निंतिं खः गुगु तच्वकं हे मखुगु खँ खः । वास्तवय नेवाःतय्सं हना वयाच्वंम्ह भिन्द्यःया मूस्वरुप धैगु तिब्बतया ल्हासाय् दु । (भाजु कल्याणमित्रं च्वयादिगु, सन्ध्याटाइम्सय् प्रकाशित च्वसु) नेवाःतय्गु बनेज्या ल्हासा नाप हे यक्व दु धैगु इतिहास कथंहे प्रमाणित नं खः । थःगु ब्यापार, व्यवसाय सुथां लाकिम्ह, न्ह्याबलें भिं याइम्ह भिन्द्यःयात नेवाःतय्सं हना वयाच्वंगु दु । भिन्द्यःया किपा स्वयेबलय् अन गनं नं व किपा महाभारतया भीमसेनया खः धकाः धायेगु आधार मदु । व किपालय् मेपिं पंतपाण्डबत मदु । भिन्द्यःया येँ भिन्द्यःत्वालय् च्वंगु मुर्तिइ नाप नापंं मेमेपिं तान्त्रिक देवीदेवतापिं खः । अन प्यम्ह हे जक मूर्ति पलिस्था याना तःगु दु । युधिस्थिर धयातःम्ह नं मदु । उकिं भिन्द्यःया किपा व भिन्द्यः मूर्ति महाभारतया भिमसेनया मखु । छायधासा महाभारतया भीमसेन जुइगु छगू हे जक आधार धैगु अन युधिस्थिर, द्रोपदी व मेपिं स्वम्ह किजापिं नं अवश्य दय् हे माः । छाय्कि महाभारतग्रन्थय् भीमसेनया छुं हे स्वतन्त्र अस्तित्व मदु । कलाः छम्हला न्याम्ह न्याम्हेस्यां इनेमाःपिं, थः दाजुं छु धाल व हे भापिइमाःपिं, थः मानप्रतिष्ठा, राज्य व कलाःतकं धर्मया नामय् बरःतइपिं मध्ये छम्ह भीमसेन गनं झी, आत्मसम्मान व स्वाभिमानंजाःपिं नेवाःतय् आजद्यः, झी भिन्द्यः थ्व गुबलसं जुइफइ मखु, जुइफइ मखु । धौख्यःयात धुलिखेल धायेथें झी भिंयाइम्ह द्यः भिन्द्यःयात भीमसेन धाये दैमखु । सुभाय् ।