चम्पादेवीमा बुद्ध विहार बनाउने सम्बन्धमा सम्झौता

 चम्पादेवीमा बुद्ध विहार बनाउने सम्बन्धमा सम्झौता

कीर्तिपुर नगरपालिका वडा नं. ४, चम्पादेवीमा भगवान गौतम बुद्धको १०८ फिट अग्लो प्रतिमाका साथै बौद्ध विहार बनाइने भएको छ । मित्रराष्टू थाइल्याण्डको थम्मचोटमँखोल फाउण्डेशनद्वारा “बुद्ध उद्यान फ्रासाई थाई नेपाल” नामक कीर्तिपुरमा विहार निर्माणको लागि आवश्यक जग्गा कीर्तिपुर नगरपालिकाले उपलब्ध गराउने भएको छ ।

  यसका लागि आइतबार कीर्तिपुर नगरपालिका र थाईल्याण्डको थम्मचोटमँखोल फाउण्डेशन बीच दुईपक्षिय सम्झौता सम्पन्न भएको थियो । कीर्तिपुर नगरपालिका भवनमा सम्पन्न उक्त सम्झौतामा कीर्तिपुर नगरपालिकाको तर्फबाट नगर प्रमुख रमेश महर्जन र फाउण्डेशनको तर्फबाट CEO Ms.Ploythonglompetch thammachomongkhol ले हस्ताक्षर गर्नु भयो । 

समारोहमा कीर्तिपुर नगरपालिकाका उप-प्रमुख सरस्वती खड्का, वडा नं. ४ का सदस्य सुरेन्द्र खनाललगायत नगरपालिकाका कर्मचारी र फाउण्डेशनको नेपाल प्रतिनिधि संस्था लुम्बिनी दर्शन धर्मशालाका अध्यक्ष राकेश महर्जनलगायत पदाधिकारीहरूको उपस्थिति रहेको थियो । 

       नगरपालिकाको तर्फबाट उपलब्ध हुने जग्गामा बौद्ध धर्मका प्रमुख चार तीर्थ स्थलहरू लुम्बिनी, बोधगया, सारनाथ र कुशीनगरको प्रतीकसँगै भव्य विहार, ध्यान केन्द्र रहनेछ र बुद्ध मूर्ति मूनि उपोसथ हल रहनेछ ।  

     उक्त विहार तथा बुद्ध मूर्ति स्थापनाले नेपाल थाईल्याण्ड बीचको मैत्री सम्बन्धमा प्रगाढता आउनुका साथै विहार क्षेत्रमा आन्तरिक तथा धार्मिक पर्यटनको गतिविधि बढ्नेछ ।