बाघभैरव सहकारीको २५ औं वार्षिक साधारण सभा

बाघभैरव सहकारीको २५ औं वार्षिक साधारण सभा

बाघभैरव सहकारी सुरक्षित सहकारी हो— प्रमुख अतिथि बागमती प्रदेश सांसद एवं पूर्व सहकारी मन्त्री पुकार महर्जन

कीर्तिपुर नयाँबजारस्थित आफ्नै भवनमा संचालित बाघभैरब बचत तथा ऋण सहकारी संस्थाले गत पौष २६ गते बाघभैरब बैंक्वेटको सभाहलमा २५ औं वार्षिक साधारण सभा सम्पन्न गरिएको छ ।

संस्थाका अध्यक्ष नवीन नकर्मीको सभापतित्वमा प्रमुख अतिथि बागमती प्रदेश सांसद एवं पूर्व मन्त्री पुकार महर्जनले पानसमा दीप प्रज्ज्वलन गरी उद्घाटन गर्नु भयो । संस्थाका संस्थापक अध्यक्ष एवं कीर्तिपुर नगरपालिकाका मेयर स्व.राजकुमार नकर्मी र शेयर सदस्य रोशन महर्जनलाई एक मिनेट मौन धारण गरी श्रद्धाञ्जली अर्पण गरिएको थियो । 

ऋण उपसमितिका संयोजक अमरकाजी श्रेष्ठले स्वागत मन्तव्य राख्ने क्रममा संस्थाको आर्थिक स्थितिबारे प्रष्ट रुपमा ब्याख्या गर्नुभयो ।

संस्थाका अध्यक्ष नवीन नकर्मीले वार्षिक प्रतिवेदन प्रस्तुत गर्ने क्रममा २०५७ सालमा रु. १० लाख शेयर पूँजीबाट सुरु गरेको संस्थाको अहिले आएर रु ७,८५,५२,१००/ पुगेको बताउनु भयो ।

उहाँले शेयर पूँजी आ.व.२०७९/०८०मा रु.७,३६,५५,७००/ रहेकोमा आ.व.२०८०/०८१ मा रु.७,८५,५२,१००/ पुगेको छ जुन गत वर्षभन्दा ६.६५%प्रतिशतले वृदि भएको छ ।

त्यस्तै निक्षेप संकलन आ.व.२०७९/०८० मा रु.१,१८,९९,२७,६३९/रहेकोमा आ.व. २०८०/०८१ मा रु.१,०७,६४,६६,६२४/ रहेको छ । जुन गत वर्षमा भन्दा ९.५४% घटेको छ । निक्षेप संकलनमा कम आएझै कर्जा लगानीमा पनि घटेको छ । आ.व.२०७९/०८० मा रु.१,२६,५१,४२,६८१/ रहेकोमा आ.व.२०८०/०८१ मा रु.१,१२,८९,३२,४२८/ रहेको छ । जुन गत वर्षभन्दा १०.७७%ले घटेको छ । त्यस्तै सञ्चालन आम्दानी आ.व.२०७९/०८० मा रु.१,८२,७९,८२२/ रहेकोमा आ.व. २०८०/०८१ मा रु.२,०६,९३,७४०/ रहेको छ जुन गत वर्षभन्दा १३.२१%ले बढी देखिन्छ । हाल शेयर सदस्यहरुको तर्फबाट नियमित बचत योजना अन्तर्गत मासिक रुपमा करिब रु.३ लाख रुपैयाँ संकलन भैरहेको जानकारी दिनुभयो । अहिले देशमा आएको आर्थिक मन्दि र सहकारीप्रति जनमानसमा फैलिएको डर त्रासले कारोबारमा केही कमी आएको हो । तापनि यस सहकारीलाई त्यति असर नगरेको जानकारी दिनुभयो ।

प्रमुख अतिथि बागमती प्रदेश सांसद एवं पूर्व पर्यटन, संस्कृति तथा सहकारी मन्त्री पुकार महर्जनले संस्थाको बार्षिक प्रतिवेदन हेरीसकेपछि बाघभैरव सहकारीका निक्षेपकर्ताहरुले आर्थिक मन्दि भएतापनि पीर लिन नपर्ने बताउनु भयो । किनकी यस सहकारीको तरलता काफी छ । विभिन्न बैंकहरुमा जम्मा पूँजी गत वर्ष रु.६०,९२१,९८६/ रहेकोमा यस आ.व.मा १४४,८७०,२१८/ जम्मा भएको छ । जुन गत वर्षभन्दा दोब्बर रहेको छ । यस सहकारीलाई शेयर सदस्य र बचतकर्ताहरुले पनि साथ सहयोग दिइरहेको देखिन्छ भन्नुभयो ।

कीर्तिपुर नगरप्रमुख कृष्णमान डंगोलले कीर्तिपुर नगरपालिका अन्तर्गत रहेका सहकारीहरुलाई सहयोग गर्न नगरपालिका हरदम तयार रहेको बताउनु भयो । 

सहकारी शाखा प्रमुख सुजिन्द्र महर्जनले अहिले बजारमा आर्थिक मन्दि भएतापनि यस सहकारीलाई खासै प्रभाव पारेको देखिएको छैन । यसो हुनुमा यस सहकारीले सहकारी नियमलाई पुरा पालना गरेका कारण हो । अहिले कीर्तिपुरमा शिव शिखर, कृषि विकास बहुउदेश्यीय सहकारी र दर्शन सहकारी कीर्तिपुर नगरपालिका अन्तर्गत नरहेको जानकारी दिनु हुँदै कीर्तिपुरमा संचालित सहकारीहरुमा खासै समस्या नरहेको बताउनु भयो । कीर्तिपुर नगरपालिकाले अनुगमन तिब्र पारिरहेको जानकारी दिनुहुँदै सहकारी संचालक र शेयर सदस्यहरुको आपसी तालमेलका कारण यो सहकारी नम्बर एक हुन सफल भएको बताउनु भयो ।

उक्त कार्यक्रममा प्रमुख अतिथि सांसद पुकार महर्जनले बाघभैरव सहकारीको २५ औं वर्षको लोगो लोकार्पण गर्नु भएको थियो ।

कार्यक्रम सस्थाका कोषाध्यक्ष मिलनमान महर्जनले संचालन गर्नु भएको थियो ।